ວິທີເພາະແກ່ນໝາກອະໂວຄາໂດ້

ສະບາຍດີ ຄົນທີ່ມັກກິນໝາກອະໂວຄາໂດ້ທັງຫລາຍ....

ຂອບໃຈຮູບຈາກ Google

ໝາກອະໂວຄາໂດ້ (Avocado) ດັ່ງທີ່ເຮົາທຸກຄົນຮູ້ກັນດີຢູ່ແລ້ວວ່າເປັນໝາກໄມ້ທີ່ໃຫ້ລົດຊາດແຊບມັນ ແລະ ຍັງມີຄຸນປະໂຫຍດຫລາຍຢ່າງອີກດ້ວຍ ນອກຈາກຈະໃຫ້ຄຸນປະໂຫຍດທາງດ້ານສຸຂະພາບແລ້ວ

ຍັງສາມາດນຳມາໃຊ້ປະໂຫຍດທາງດ້ານຄວາມງາມໄດ້ອີກດ້ວຍ

ເຊິ່ງລາຄາໝາກອະໂວຄາໂດ້ໃນຕະຫລາດບ້ານເຮົາກໍ່ຖືວ່າແພງພໍສົມຄວນ

ຖ້າທຽບໃສ່ລາຄາຕະຫລາດປະເທດບ້ານໃກ້ເຮືອນຄຽງ

ດັ່ງນັ້ນ ຈະເປັນການດີບໍທີ່ເຮົາຈະມາລອງເພາະແກ່ນປູກເອງ

ເພາະບໍ່ມີຫຍັງເສຍຫາຍ ແລະ ບໍ່ໄດ້ລົງທຶນຫຍັງ (ອາດຈະເສຍຄ່ານ້ຳເພີ່ມໜ້ອຍໜຶ່ງ... ເຫະໆ)

ແຕ່ບາງຄົນກໍ່ອາດຈະເວົ້າວ່າຊື້ກິນງ່າຍກວ່າ ... ອັນນີ້ເຮົາກະບໍ່ຖຽງເນາະ (^_^)  

ແຕ່ວ່າຖ້າເຮົາໄດ້ລອງປູກເອງກໍ່ອາດຈະເກີດຄວາມພູມໃຈນ້ອຍໆ

ເມື່ອໄດ້ເຫັນຍອດອ່ອນ ແລະ ຮາກທີ່ປົ່ງອອກມາຈາກແກ່ນ

ແລະ ເມື່ອເອົາຕົ້ນອ່ອນລົງດິນ ໄດ້ເຝົ້າເບິ່ງການຈະເລີນເຕີບໂຕ (ເຊິ່ງອາດຈະໃຊ້ເວລາຫລາຍປີ (-_-!) )

ຈົນໄດ້ເຫັນໝາກຂອງມັນໃນທີ່ສຸດ ຄິດເຖິງຕອນນັ້ນຄົງຈະຍິ້ມແບບພູມໃຈວ່າ ຕົ້ນນີ້ແຫລະທີ່ຂ້ອຍປູກມາຈົນໃຫຍ່ເປັນໝາກດ້ວຍຕົວເອງ ຫະຫະຫະ (^_^)

ເອົາລະບາດນີ້ ເວົ້າມາຫລາຍລະ ມາລອງເບິ່ງວີທີງ່າຍໆໃນການເພາະແກ່ນກັນເລີຍ

ສິ່ງທີ່ຕ້ອງກະກຽມ:

1. ແກ່ນໝາກອະໂວຄາໂດ້

2. ຕຸກນ້ຳດື່ມເປົ່າ

3. ໄມ້ຈິ້ມແຂ້ວ

4. ນ້ຳສະອາດ

ຂັ້ນຕອນທຳອິດ ຕັດຕຸກນ້ຳດື່ມໃຫ້ໄດ້ຄວາມສູງປະມານຄືບໜຶ່ງ ຫລື ອາດຈະຫລາຍກວ່ານັ້ນໜ້ອຍໜຶ່ງ
ແກະເອົາເປືອກສີນ້ຳຕານທີ່ຫຸ້ມແກ່ນອະໂວຄາໂດ້ອອກ ເນື່ອງຈາກຖ້າບໍ່ແກະຈະເຮັດໃຫ້ຮາກ ແລະ ຍອດອ່ອນປົ່ງອອກມາຊ້າ
ຕໍ່ມາເອົາໄມ້ຈິ້ມແຂ້ວມາສຽບໃສ່ແກ່ນຂອງອະໂວຄາໂດ້ ອາດຈະສຽບເປັນ 3 ຈຸດ ຫລື  4 ຈຸດກໍ່ໄດ້
ໃຫ້ສັງເກດເບິ່ງແກ່ນວ່າເບື້ອງທີ່ແຫລມແມ່ນຍອດຈະປົ່ງອອກມາທາງນັ້ນ
ສ່ວນເບື້ອງທີ່ຈຸດສີນ້ຳຕານ ຫລື ຫລຸບລົງໄປແມ່ນທາງທີ່ຮາກຈະປົ່ງອອກມາ
ຫລັງຈາກນັ້ນເອົາແກ່ນທີ່ສຽບໄມ້ຈິ້ມແຂ້ວແລ້ວມາວາງໄວ້ເທິງປາກກະຕຸກທີ່ເຮົາຕັດໄວ້ກ່ອນໜ້າ
ແລ້ວເທນ້ຳໃສ່ກະຕຸກໃຫ້ພໍທ້ວມກົ້ນແກ່ນອະໂວຄາໂດ້
(ເບິ່ງຕາມຮູບເລີຍເນີ້)

ຄວນວາງແກ່ນທີ່ເຮົາເພາະໄວ້ບ່ອນທີ່ອາກາດຖ່າຍເທ ແລະ ບໍ່ຖືກແສງແດດໂດຍກົງ
ຫລັງຈາກນັ້ນກໍ່ລໍຖ້າໄປປະມານ 1 ຫາ 2 ເດືອນ ຈຶ່ງຈະເຫັນຍອດອ່ອນ ແລະ ຮາກພົ້ນແກ່ນອອກມາ
ແຕ່ໃຫ້ພະຍາຍາມປ່ຽນຖ່າຍນ້ຳໃນກະຕຸກດ້ວຍ 3 ມື້ປ່ຽນຄັ້ງໜຶ່ງ ຫລື 1 ອາທິດປ່ຽນຄັ້ງໜຶ່ງກໍ່ໄດ້
ຕ້ອງໝັ່ນສັ່ງເກດເບິ່ງລະດັບນ້ຳໃນກະຕຸກ ລະດັບນ້ຳຕ້ອງຖ້ວມກົ້ນແກ່ນຢູ່ສະເໝີ

ຮູບນີ້ແມ່ນເລີ່ມເພາະແກ່ນແຕ່ກາງເດືອນກໍລະກົດ ໃນທີ່ສຸດຍອດກໍ່ພົ້ນແກ່ນອອກມາແລ້ວ

 

ຮູບນີ້ປະມານຕົ້ນເດືອນຕຸລາ ຕົ້ນສູງຂຶ້ນມາຫລາຍແລ້ວ

ມີຂໍ້ສັງເກດຢູ່ບ່ອນວ່າ:
- ຖ້າເພາະແກ່ນຢູ່ບ່ອນຮົ່ມທີ່ແສງແດດສ່ອງບໍ່ເຖິງ ລຳຕົ້ນທີ່ປົ່ງອອກມາຈາກແກ່ນຈະສູງ
ແຕ່ວ່າໃບຈະໜ້ອຍ

- ຖ້າເພາະແກ່ນຢູ່ບ່ອນຮົ່ມແຕ່ແສງແດດສ່ອງເຖິງ ລຳຕົ້ນທີ່ປົ່ງອອກມາຈາກແກ່ນຈະສັ້ນ
ແຕ່ວ່າໃບຈະໃຫຍ່

ໃນທີ່ສຸດກໍ່ກຽມພ້ອມລົງດິນແລ້ວ.... ເຢ້ ເຢ້ ເຢ້

ລໍຖ້າໄປອີກຫລາຍປີຈຶ່ງຈະໄດ້ກິນນ້ຳພັກນ້ຳແຮງຂອງເຮົາ... ເອ່ະ ຫລືອາດຈະບໍ່ໄດ້ກິນ ເຫະໆໆ

ຈັ່ງໃດກະຂໍໃຫ້ເຕີບໃຫຍ່ຢ່າງແຂງແຮງເດີ້ ສູ້ໆ